Sikujaliwa na moyo wa chuma
Kuhimili yako mahaba na maumivu
Kanichoma, mtima waniuma
Tele, roho yangu imejaa maumivu
Maisha yamenikwisha yake hamu
Kanitia karaha moyoni mwangu
Usoni mwangu sinayo tena tabasamu
Nashindwa kukuita tena mpenzi wangu
Tazamio langu nilidhani tatizo marafiki
Wachochezi wenye hulka za kinafiki
Kumbe yote ni wewe, kunguru na mwewe
Asali nilipenda, kaona heri kuchonga mzinga
Hakika nyuki kumfuga sharti ukubali na kuumwa
Maumivu chungu nzima nashindwa kuvumilia
Hisia mfarakano, moyoni nalia

Penhive ✍🏾

Una urembo kama hurlaini wa peponi
Hisia zangu wazitia motoni
Kila usiku u mwangu ndotoni.
Macho yako mazuri
Umbo lako nane namba
Unanukia uturi
Una Sauti kama kasuku
Na nyodo kama vifungo
Ni mwenye hakika huba
Mahaba moyoni yamenikaba
Penzi moto zaidi ya jua
Wewe umeniridhi wengine wote pangua
Napenda ulivyo, mso maringo
Mahaba ndo langu kuu lengo
Nakupenda, dhambi kusema uongo

Ni wengi yamewaliza,
Wengine yamewaliwaza,
Yanacho kiza,
Yanao pia mwangaza,
Tamu kama pizza,
Katu mja huwezi mkataza,
Yana uchungu mate kumiza
Yana utamu wake, roho kufaza
Yana visasi,kulipiza
Kiungulia,hisia kukata ja mashaza
Akili sanasana kuwaza
Furaha moyoni kujaza
Yanayo taharuki ya giza
Mja hali kumchakaza
Hali yake kuwazawaza
Nafsi kufurahi,nafsi kukwaza
Ila sana hupendeza
Moyo kudekeza…
Nasisitiza
Ni wengi yamewaliza
Wengine yamewaliwaza